Almenn heyrnarþjónusta

Almenn heyrnarþjónusta samanstendur af röð þátta og mælinga. Byrjað er á að skrá sjúkrasögu skjólstæðings og að því loknu eru eyrun skoðuð og þau hreinsuð ef þörf krefur. Í þessari skoðun er hægt að sjá hvort einhver vandamál séu til staðar sem tengjast hlust eða hljóðhimnu. Í framhaldi af því er heyrnin prófuð.

Hefðbundnar mælingar sem oftast eru gerðar:

• Loftleiðnimæling
  • Mæling á getu viðkomandi að heyra hreina tóna. Niðurstöður prófsins sýna lægsta hljóðstyrk sem viðkomandi heyrir á mismunandi tíðnum eða svo kölluð heyrnarmörk viðkomandi.
• Beinleiðnimæling
  • Í vissum tilfellum eru heyrnarmörk einnig mæld með því að koma fyrir beinleiðara/titrara fyrir aftan eyrað. Beinleiðnimælingin sýnir hvort um er að ræða vandamál/hindrun á leiðni hljóðsins um miðeyrað.
• Talgreiningarpróf
  • Prófið kannar getu viðkomandi til að greina tal og hvort að einhverjar heyrnartruflanir séu til staðar sem tengjast talskilningi.
• Þrýstimælingar
  • Mæling sem metur ástand miðeyrans og hreyfanleika hljóðhimnunnar.

Í vissum tilfellum er gripið til sérmælinga.

Niðurstöður mælinga eru skráðar á heyrnarpróf/heyrnarrit, sem sýnir hvort heyrnarskerðing sé til staðar og hversu alvarleg hún er. Farið er yfir niðurstöður mismunandi mælinga, þær útskýrðar og ráðgjöf veitt um næstu skref.